نايف صقر

[الـــصـــعــــب]

عـود يفـوح



القلب عود يفوح والطيب من مكسره
تحته من الجمر مايوقد سكات الرماد
والعين مغرورقه بالدمع ومبعثره
بين الصور والرسايل والدجا والسهاد
حنا اليا حسبنا مازرعنا الذره
قل للعصافير تتركنا وقل للجراد
البارحه جف في غصن الملام ثمره
عقب البياض انكسر ضلعه وسال السواد
والناس خلان قبل الريش والمحبره
شعوب وفخوذ واحباب وصباح وهجاد
هذا الجمل لو سنامه سامك فـ ظهره
ماله عزوم يقوم بها ولا له شداد
ياذيب عيد على قلبه وفج نحره
دامه رغى عقب هدراته وشم الحماد
تمخض الوكر والقرناس عن حمره
في راس قشعه لعب فيها الظما والنفاد
يوم النحاس انصدع لونه وذاب أصفره
غنيت للسنبله كل اغنيات الحصاد
مايدفي الا الوبر والوصل والمقدره
لازاد شوك الشتا في راحتك والفؤاد
ولاصار ما لك اليا منك ركضت اغبره
شوري عليك اترك البيدا .. وكب الطراد

[الـــصـــعــــب]

صاحبي عذبتني



صاحبي عذبتني صاحبي وريتني
في لقا ساعه بعض حلم وسنينٍ قادمه
ياحبيبي كان ماسميتني .. سميتني
ليت روحي منك ياعذب الموادع سالمه
جيتني لولا الليالي جابتك ماجيتني
والليالي جابتك مثل القدر كل الظروف تسالمه
آه ماخليتني ثم رحت ماخليتني
في دروب طوال مهزمه معاك وهازمه
كن في عينك من العشره اليا باريتني
شي اقل من الحيا بعيون ضيف وعازمه
ليتني لاجابو اسمك ياحبيبي ليتني
تشرب الذكري بعض عيني وعيني حازمه
انت لودليتني فرقاك .. مادليتني
دام حبك في جبين الليالي واسمه
لك بكي جرحي قصيدي وانا ما أبكيتني
آه ياحر الوجع في النفوس الجازمه

[الـــصـــعــــب]

القلـب

القلب كل ارباعه خلي وعروق
يقرا به الظامي قصيدة سرابه
للريح في رمل التباريح محروق
وتلعب خماسين الوله في ترابه
ومع القلم هات ابيض الطرس ياصفوق
راعي الهوى ماجابنا.. الورق جابه
لو من حل حكاية الشهد مخلوق
ماكرم الله العسل في كتابه
لو للسحايب ياطويل الهدب سوق
شريت لك برقٍ رهيف وسحابه
هتانها ياصاحبي لو هطل فوق
اخضرت اطراف السما من عتابه
شاعر عيونك لاكتب فيك طاروق
تختال اسارير الزهر في ثيابه
والفرقا ماتنبت بختري ورقروق
ولاتشرح الصدر الحزين الربابه
وكان انكرت صوتي وتوديهي النوق
باموت من قل الوفا والصبابه
باسباب ما اعاني من الوجد والشوق
إن غبت .. اجروحك بقلبي تشابه

[الـــصـــعــــب]

ذكراه تشعلها



ذكراه تشعلها عصافير واجراس
بس المحه ف .. اجمل زوايا كياني
الغايب اللي كن في عينه نعاس
أخاف اموت من الظما ماسقاني
ياما عصيت انزف على كل قرطاس
وياما الوله لاحباب عيني نعاني
والله ما ابغي من ورا الترف نوماس
أنا القصيد إبليت به وابتلاني

[الـــصـــعــــب]

الشعــر



يقولون الشعر وصف القلم والصفحه الطرقى
وانا اقول الشعر قدح الخيال ونار صوانه
حبيبي والبحر سور التراب ودفتر الغرقى
لو اني ماكتبتك لامني ملحه ومرجانه
حبيبي لاهمت حبر العروق الغيمه الزرقا
على رمل الورق دمي سحاب هل هتانه
حبيبي كل ماذعذع جفاك وناحت الورقى
يتل البال قلبي واهدي السجات جنحانه
حبيبي وانت مرقاب الشجون وهاجس المرقى
ترى كلٍ يموت الا الوفي بعيون خلانه
حبيبي والجروح اللي سببها ليلة الفرقا
ضما يدها الوصال اليا ظما المحروم حرمانه
حبيبي لو يسامحك البحر وتبيحك الغرقى
أنا ما اسامحك لو لامني ملحه ومرجانه

[الـــصـــعــــب]

هـم المحـاجـر



ياحبيبي والبكا .. هم المحاجر
بالدموع ابرد مناديلي كويته
آه من صوت ترك كل الحناجر
وانتثر في دفتري شعر وقريته
كل هذا .. وانت قاسي قلب هاجر
ماهداك الله واخذت اللي عطيته
صاحبك لين حشا والحسن فاجر
من لمحته قلت جاك اللي بغيته
من غرامك في غلاك ارحل واهاجر
وان ضواني ليل من يمك سريته
لاتزيد طعوني أوجعت الخناجر
مابقي عرقٍ بقلبي ماثنيته
لو عيوني غيم واهدابك محاجر
ماظما رمشك تحت دمعٍ بكيته

[الـــصـــعــــب]

حظ القلـم


الموت حظ القلم والمجد للدفتر
حبر القلم غلطتي وايامي اوراقي
الخوف يجتاحني وجه الطريق أسمر
راح اكثر العمر ياخوفي على الباقي
ياجرح رافقتني للناس لاتظهر
وان عشت في نظرتي مامت باعماقي
ياصوت لاتلتحف صمتي ولاتصبر
قل ماتبي واترك الهقوه على الهاقي
والخطوه اللي عن آخر سكتي تقصر
ماهيب من طبع رجليني ولاساقي
مانيب من عاش لايربح ولا يخسر
ولاهو ضرري تكون أفعالي أخلاقي
ثراي ماينشد الغيمه متى تمطر
مادامها في سماي تحن لاغراقي
رح وين ماتشتهي رح قد ماتقدر
أنا اول الناس في قلبك وانا الباقي
يكفيني انك تعذبني وانا اتفجر
قصايدٍ تنتظرها كل عشاقي
وانا قصيدي يجي مختارني مهجر
وأنبت عشانه نخل وسنيني الساقي