الشاعر فرج الصباح

[الـــصـــعــــب]

ربيـع


تحرث العين وجهك لاجل اشوفك ربيع
غير شوفك حصادي مرخصه للجراد
ما زرعتك بعيني وناويٍ لك ابيع
عفت رزعي بغيرك قبل يولد حصاد
ايه ياللي نخاني جاك قلبي مطيع
هات عينك ليال وهاك عيني رقاد
انت ياللي سقيتك نص عمرٍ يضيع
ونص عمرٍ تشكل في جبينك حماد
ما خبرتك بروحي غير حلم وضيع
كيف تصبح لعيني بالشدايد عناد
مثل ليل اليتامى في هجير وصقيع
تحتويني جروحٍ لك خفوقي ضماد
يرتدي الجرح ثوبٍ من ظنوني وسيع
وينزع الجرح ظنه يرتدي لك وكاد
كل ذنبك حملته كل شوفك شفيع
وكل حرفٍ دفنته في شفاتك مداد
هبت الريج تعصف جذع قلبٍ رفيع
لا تعاتب وضوحي في غموض العباد
لرمش عينك مهاجر في رجاها وديع
لغيرها عالم الله صار صدّي بلاد

[الـــصـــعــــب]

الحـر


آه والحر لامنه تبرقع يضيع
ونت حر ولكن لا تبرقعت ضعنا
ايه ياللي تمايل فوق همي شفيع
صرت بوحي ولكن سيف صمتك قطعنا
هو بقا فالليالي غير عينك بديع
تكشف اللي يثرثر عن جمال خدعنا
انت يا اشهى عطش لا انت يا اشهى ربيع
من سكنتك سكني للغلا الف معنا
صاحبي والمشاعر معك طفل رضيع
كل ما ملت عنها تمتمت حيل جعنا
قلبي اللي خذيته للمحاجر صريع
يعلم الله صبرنا ..يعلم الله جزعنا
ليت قلب يحبك مثل قلبك يبيع
يطوي اللي بقى من كل شوق ويعنا
واله اني وفيت ان كان خان الجميع
لو هو الحظ يهدم كل حلم جمعنا
الامل بك ذبحني مثل عينك وسيع
من نظرته ..نظرته قلت يامر وطعنا
آه واجمل جهاتي لا لقيتك تضيع
كل ما جيت ابنسى صاحت الروح ضعنا

[الـــصـــعــــب]

أول غـلا




يااول غلا لا تلوي القلب لاهنت
واللي بقى ماغير وجهك وصبري
لوذ بذاك الشوق شوف انت من انت
وشلون دنق طيب القلب بدري
في هالزمن لقفى بك الحظ ما صنت
الاعيون تلفت وين مدري
ياحبي اللي لا كفر طحت وآمنت
ان الغلا طفل بكا فوق صدري
ياما شقيت بلجه الحب ما خنت
تخطي واسابق قبل عذرك بعذري
اما تجي وتكون بالقلب ماكنت
والاتبيع وسود الايام تشري
حاولت اجازي بالخطا منك وايقنت
حتى الخطا يا سيدي منك يغري
الله يا جرح حلا مثل ماانت
قلبي يصيح وصحت يا قلب بدري

[الـــصـــعــــب]

غبـي

الحب مثل الشقا ما يلزمه خبره
ولا يغلب الا ذكي بالغلا داري
وانا غبي يحب الكل بالفطره
كل لبس من غلاي ووحدي العاري
احبابي اللي جفاهم ما مدا جبره
واحبابي اللي خذوا من طيبتي ثاري
يا ليتهم لو دروا هالجرح يا كبره
ما كان مالوا علي مع ميلة اقداري
هم خذلوني وضاق القلب من صبره
من غابوا وغابت اجمل اخباري
من قبلهم والليالي مضلمه عسره
واليوم الملم خطاهم وانثر اعذاري
غابوا ولا به سوا حزني وهالعبره
وشكيتهم للعزيز الواحد الباري
مامت لكن زهقت وطالت الحسره
وشلون بقلوبهم ما عاد لي طاري
كن السوالف سحاب وصدهم بذره
ياما بنفسج غلاهم عطر اشعاري
الحب يلعن ابوه الحب يا كثره
ويا قله ان جيت في حزني ومشواري

[الـــصـــعــــب]

الحرمان والذكـرى



اقسى من الهم والحرمان والذكرى
احساسى انك لغيرى وانت فى يدي
احساس ان العمر ما عاد به بكرا
لاصرت اسولف شقاى لصاحبٍ ضدى
روح اسأل الليل عن حالى وما يجرا
لا جابك الليل بأشعارى وانا ودى
لا جابك الليل ليه اكتب؟ وليه اقرا؟
لاجابك الليل كل الكون مو قدى
تعال اضمك بروحى قبل هالمسرا
تعال اببكيك فى ضحكى وفى جدى
عيا زمانى!!!؟ زمانى ليه ما يطرا؟
ماهو بكيفك يمر القلب ويعدى
هذاك وردى غلاه ونيته خضرا
هذاك كنت السؤال وكان لى ردى
ماغيره اللى سألنى هاه تب تبرا؟
وصاحت جروحى دخيل العشق ما ودى
هذى يمينى برحيله كنها اليسرا
الله حرمنى سلامه وش لى بيدى؟؟

[الـــصـــعــــب]

المـرايا



لان المرايا ما لها صوت ولسان
كل القصايد فيك نبض المرايا
هى عينك اللى غربلت زهو الالوان
من يومها والليل لون الهدايا
يا الممتلى باحيان والناحل احيان
من علمك ترتيب طيش الزوايا
قدك وذابت بالحسد حزمت اغصان
ما فاد يالاغصان حسن النوايا
يقطع زمانك وش بقى ما بعد بان
لا صاح زينك تو باقى بقايا
صدفتنى والقلب ميّت من ازمان
تركتنى والقلب يركض ورايا
بعدك ذنوبى لا غدا القرب غفران
شفنى دخيلك كل كلى خطايا
عذر المرايا سيدى لوهى انسان
يحرم عليها غير وجهك مرايا