ناصر القحطاني

[الـــصـــعــــب]

مهـزلـة



تدرين يا حلوه متى العاشق يحس بمهزله؟
لا جاه شيٍ مثل شي قام يحداني حدي
ما اقسى من دموع اليتيم الا ذكر ضحكة هله
ولا يهد من الفراق الا الفراق السرمدي
يا الورده اللي في شرايين الحشا متغلغله
يا روحي اللي لو تبرت مني اختل جسدي
كونت لك عالم غرام ما دخله البلبله
الا هديرٍ ينتهي بين الظلوع ويبتدي
حتى اقرب اصحابي من اللوعه سهيت وقلتله
يا الاجودي كف العذل ما في العواذيل اجودي
انا اللي استاهل عناقيد العنب ي مدللّه
ليتك دريتي كيف عيني تذكرك في مرقدي
يدنا من الغيم ان تغطرس واطول من السنبله
يا اقرب كثير من الحكي وابعد شوي من الجدي
ان جيت رحتي مقفيه وان رحت جيتي مقبله ‍‍!
كم مت واليا قلتي احبك تجدد مولدي
دنياي انا لو تجتمع لذاتها في مكحله
والله مشهر لاي عينين غير عينك مرودي
يا ذابحتني كل شي الا الجفا متحمله
يا كبر كذبت عزتي لو قلت اب ابعد وابعدي
قلبي لو اغديتيه في الصحرا بليا بوصله
ما تاخذين الا وهو لاقصى ظلوعك مهتدي
وان خاب ظني واخر المشوار جا مثل اوله
بغمض عيوني وابحلم واقهر الحظ الردي
باحلامنا حتى آخر المريخ نقدر نوصله
الله لو نطلع بساط الريح وايديك في يدي
تخيلي روضٍ من اقصاه اجمل الورد احمله
واهديه ليدين وظفاير شيخة الورد الندي
تخيلي نهرٍ بلا احجارٍ تمثنى جدوله
نبقى على جاله جلوس شوي وشوي نعدي
تخيلي بيتٍ دفاه من المواجع والوله
ضحك وسواليف وسهر ومزوح وبساط احمدي
تخيلي عشقٍ عجزت استوعبه واتخيلّه!
كانه على هالحال ؟ ما عزالله ابشر بسعدي
يا سيدة عشقي وانا راعيه راعي الأوله
ما هي كثيره لو تقولين انت والله سيدي
ترى الله اللي حط لك ذاك الغلا والمنزله
والا الهوى لا ورث ابوي ولا ذخرته لولدي
حبيبتي ما يقهر الرجال في مستقبله
الا الهوى اللي مرةٍ يقبل ومرات يغدي
حتى الوفا لا زاد عند حده يعوّد مهزله
يا ليتني خنتك ولا اللي كان يحداني حدي


http://img102.herosh.com/2009/08/02/382156518.gif

[الـــصـــعــــب]

خويـة درب عمـري








خوية درب عمري ما خذاني دونه النسيان
وانا يا اهل الملامه ما رغبت العيش وحداني
ابي لي مهرهٍ ماعسفت صغيره وبنت حصان
ابوها اللي يفك المشكله ويزبن الجاني
واخوها لا تعزوا باسمها فزوله العربان
يحق لها الفخر في قوله آآل فلان جداني
ابيها في بحر عشرين لا زود ولا نقصان
ابيها اقصر طويله والوصوف اشكال الواني
ابي الجبهه كما الصبح وكما القوس اسود الحجان
وابيها ناعسات ونرجسيه سود الاعياني
ابي رمش كما ريشٍ يغطي الثلج ف الاوجان
وابي جفن يشيل الرمش طربانٍ وكسلاني
ابي خدٍ كما وردٍ تنما في طرف بستان
وابي خشمٍ صغير مثل حد السيف شاماني
ابي البسمه كما البرق وثناياها كما المرجان
وشفاها جمرتين وفمها خاتم سليماني
ابي شعرٍ مثل ذيل الفرس لا طبت الميدان
او الشلال لامن بات ليله بين الامتاني
ابي جيدٍ سوات ابريق فضه ناتقٍ مليان
وصدرٍ كنه مرايه عليها طلع رماني
ابي ظهر كما جدول وقدٍ مثل غصن البان
وخصرٍ مثل مجدول العنان وجسم روياني
ابيها نابيه ردفٍ وبطن ضامرٍ جوعان
ابيها مدمجتٍ ساق وقدمها السان ثعباني
ابيها بنت عزٍ من رغدها ينعم الفستان
ابي الرقه وابي الدقه لها باطرافها شاني
ابي المشيه كما اَللي طالع من المعركه كسبان
وابيها ترش مع خطواتها مسكٍ وريحاني
ابي صوتٍ الامني سمعته كن فيه الحان
يدغدغ مسمعي ويثير كل السحر ف اشجاني
ابيها حب واخلاص وهواجيس وفرح واحزان
ابيها مثل ما دكتور اهالي العشق وصاني
ابيها لوحه ما صورتها ريشه الفنان
ابيها جوهره ما جابها قاصي ولا داني
ابيها تنتصر لي من زمانٍ حطني نيشان
وتبشر بالغلا اللي ما لفابه واحدٍ ثاني
مهرها قلب وشعر يهز القلب والوجدان
والبسها القصيد وتصبح اوزاني وقيفاني
ابي اللي فات واللي فات صعب ومن لقا العنوان
يرد العلم ولا افضل ابقى اعيش وحداني

[الـــصـــعــــب]

اخيرا جيـت






اخيرا جيت مثل الزوبعة لا جت بها الاقدار
فراقك عيد وجروحي ما بي غيري يعايدها
انا ويا الهوى سمن وعسل واليوم ملح ونار
لا عاد اسمع زغاريده ولا ابغي من يزغردها
حبيبي جايني بعديش بعد الذل بعد العار
فواتير الزمان اللي تخبره كنت اسددها
دخيلك لا تزيد الطين بله يكفي اللي صار
تراها واصله وان طعت شوري لا تزودها
ما دامك لا انت في بالي ولاانتب من حمام الدار
انا ليه انتخي واقوم الدنيا واقعدها
ما احبك واركب اعلى ماف..خيلك وان طرالك ثار
دفعتك في مهب الريح لين تروح في يدها
زمان بعود كبريت اتتوعد والزمان انذار
وجيت بغصن زيتون ومواويل ترددها
واعذارك تجمل قولها تدري بلاش اعذار
بلاش الحجه من الباب للطاقه توردها
فضحت العشق يخرب بيت عشق ماوراه اسرار
بعدما كنت اسولف له عن احلامي وسيدها
نا ياما تعبت ابحر واعكس الريح والتيار
وابل الشوق واشرب ميته واللهفة اجحدها
اغنى للمسا والشمعدان غنايه السمار
على ذكرى الشموع اللى طفت من دون ماافقدها
غديت اشتاق والله يانى اشتاق لجفاك امرار
غديت استوعب دموع التماسيح ومشاهدها
تبى تصبح لى الما والهوا والشمس والزمار
تبي تغدق على حب الخليقه واصبح اسعدها
ياشيخ استح على دمك ترى دم الكرامه فار
كشفت المستخبي والوعود اللى تسر مدها
مدام اخر زمن ليت الغرام واخر زمن صار
وعبرات الندم دقه قديمه روح جددها

[الـــصـــعــــب]

احلـى الصبـايـا





قلت من ذيك الصبيه قالوا من احلى الصبايا
قلت اقول الله يخليها لعينٍ ترتجيها
طلهٍ ما استوعبتها لا العيون ولا المرايا
كم تعدتني وانا ما كنت والله مهتويها
مادريت الا وهي مثل النفس بين الحنايا
ان شهقت اموت منها وان زفرت اموت فيها
اثرها يوم اني اجمع ما بقالي من بقايا
عشعشت في بالي المحروسه اسم الله عليها
طفلهٍ قدامها طفل سرق همس الشفايا
كل همه كلمه ما كل الافواه تحكيها
كنها في ضحكها عيد وزغاريد وهدايا
كنها في حزنها عينٍ حورها مكتسيها
بانه اللي فارقٍ طوله مسوي بي سوايا
وارتشافت قهوته انفاسٍ تعودت احتسيها
نهر حسنٍ ضفته ستر وتواريخه عرايا
صب في عروقي وقامت ترتويه ويرتويها
عندلٍ ب افراقها تكشيره انياب المنايا
كيف ما ابيع النفيس وضحكه العمر اشتريها
حاولت لحظه من اللحظات تنثرني ضحايا
كنها اللي تنتصر لجروح حوا وتحميها
والخفوق اللي رميته بينها وبين الخطايا
تشتهي جرحه وهو في عز جرحه يشتهيها
كم بدت طفله تحب احلى القصص واحلى الحكايا
قلت امر اشكي عليها الهم واصبحت اشتكيها
كم على الما والذهب والرمل والبيض الضمايا
انقشت قلب وسهم وحروف حب تحتويها
كم قرت شعري ولدت للمرايه والزوايا
الجديل تبعثره واحلى الملابس ترتديها
وش ورا همس الغمام ان قلت يا شح العطايا
كل شي من ملامحها يجيني قبل اجيها
ماذبح تفاحٍ وفتها مغاتير النوايا
من قصد قصده شريف ومن ورد ماها يبيها
علموها بس ولا علموا كل البرايا
انها اللي عوّد امري من يديني في يديها
والله ان تبطي وهي تختال من بين الحنايا
مره تسمي عليَ ومره اسمي عليها

[الـــصـــعــــب]

السـاعة







اشغلت عينك الساعه على هونك
ودّنا نطلع من الوقت لو ساعه
في بحر سودك ابحروا شوق مضنونك
شفها الريح يوم تمازح شراعه
زيد في فتنتك لعيون مفتونك
يتبعك ما تلفت يم تباعه
كل ما لد طرفك قلت ياعونك
انت شيخ الخفوق وكثر اوجاعه
كن منت ب على بعضك وانا دونك
اتلهف لوعد عندك وداعه
كن الاهداب تشكي رعشه جفونك
كن كفك يتله مني ذراعه
لمت صمتك واثر صمتك من فنونك
لي سألتك تصير الكلمه طماعه
بس لي جاوبتني هزه متونك
كيف اعاتب خجول تحكي اطباعه
ادري انك رويت العشق ب مزونك
وادري ان الغلا في عز مرباعه
ما بقا الا اسرق الكحله من عيونك
واتجمل بعينٍ فيك ملتاعه
وان خذاك الملل حتى من طعونك
جرب الحب مره نقلب اوضاعه
قل ما اخونك واقول ان عشت لا اخونك
قل ما احبك واقول السمع والطاعه
اصعب اللي خذيته عقل مجنونك
واسهل اللي عطيته دفتر ابداعه
مزنه ما سبقها بارق سمونك
في زمان الشقي ماهي ب فزاعه
تحرسك عين من صورك وتصونك
روح ما دام راح الليل ساعه

[الـــصـــعــــب]

صباح الفقـر





يسعد صباح الفقر ياللي تذمينه
في ذمتي منتي من الفقر معذوره
ما شلت هم الرغيف اللي تشيلينه
كل الهموم لسواد العين مذخوره
منتي فقيره تقولين اليسر وينه
يا قطعة السكر من الملح ميسوره
من علّم الجوري انشودة فساتينه
من هز ريش النعاس اللي كسا حوره
من ذكّر الخيزران اللي نسا لينه
من جدّل الليل لين اختال ديجوره
سلسالك الفضي أصلا لو تزمينه
ما راحت اكثر عقود الماس مغروره
والازرق الرث يا ملحه ويا زينه
ابها من ارضٍ نهار العيد ممطوره
مستورة الحال بس القاف تغرينه
ليه اتنحى واخلي الحال مستوره
والله ل غنّي لفقرٍ تمنت سنينه
لين ايسر المترفات تموت مقهوه
قالولي ان الجديل اللي تربينه
معه تربين حلمٍ فاحت عطوره
قالوا بذاك الركن سرٍ تخبّينه
ومرايةٍ من رداة الحظ مكسوره
لا ينكسر مثلها الخاطر وتشقينه
تمنظري ف المرايه حي هالصوره
مذكور جرجٍ ورى الاظلاع تخفينه
وتحت المخده رسالة عشق مذكوره
اثر الهوى جا يسوق الشوق بيدينه
غصنٍ جفاه اليباس وزف عصفوره
يامن يكون الحبيب اللي تحبينه !
ياللي بوجه الليالي ثروه وثوره
وقتٍ مضى ملمس اللعبه تمنينه
واليوم خضر القلوب العاب منثوره
الحزن ليه العيون السود في عينه
والبحه اللي ترد الروح مذعوره
فقر ستير ولاازكى من رياحينه
ولا نعيم فضوح تغرق زهوره
والميت اللي يبي دعوات حيينه
كنتي وصاته ونزفه واخر شعوره
يازمه الغيم وارخايه هدب عينه
ماقلت لك منتي من الفقر معذوره

[الـــصـــعــــب]

بعد فـرقـاك






شف بعد فرقاك واشكثر عشاقي
من على خبرك أنا أعشق مية مره
كل مرة يرجع الود لعناقي
وأرجع أفتح جيب الاشواق وأزرّه
أتناسا بعد ما أسرعت بفراقي
ماعلي لو كبد أبوزيد محترّه
كل جرّة لانفخ روحها ساقي
عوّد وجدّد على قبرها جرّه
كنت ذوقي وإكثرت بعدك أذواقي
كم فتونٍ طاب لي حلوه ومرّه
كنت أمد الكف وأشواقي أشواقي
كنت بين العفّه وبيت أخو مرّه
كنت أهدّي روع طرفي وخفّاقي
وأنتصب للجيد والثغر والغرّه
وتغديبي بينها وبين مسباقي
ضحكةٍ تنده لها الغيم وتمرّه
وكل ما أظهر دّره تحاول إغراقي
يقطع البحّار والبحر والدرّه
امتليت من التوابيت باعماقي
والسحايب في سما العين محمرّه
يوم بثّيت أعذب الحب لأفاقي
جيت ألمّه ما طلع لي ولا ذرّه
أحسب إنه مابقى للهوى باقي
وأحسب إني كنت ناسيك بالمرّه
اكتشفت ان الهوى اللي لعشاقي
كان كذبه وكنت احبك مية مره

[الـــصـــعــــب]

طعـم المسـا









معك طعم المسا غير ومعك حتى السوالف غير
معك يا حلو تقليب المواجع بين كفينك
تبختر بين دقات الخفوق ونشوة التفكير
ترى كل الحياة اصغر من اللي بيني وبينك
احس انك تجي والعشب ينبت والطيور تطير
واحس ان السحاب يلوح يراقه على يدينك
احس بروعه الدنيا واحس ان الزمان بخير
واحسك للحياة اعذب ندا مانتب مثل عينك
اشوف الصبح لاشال الشفق هز الظلام عصير
واشوف الورد يضحك ما بقا الا ينشدك وينك
واشوف الريح تقبل مستخفه دمها وتغير
تنثر لك شعرك وتنثر سله رياحينك
ورا ما ترقص القمرا بقلب خانه التعبير
مثل ما ترقص الالوان في مسرح فساتينك
دخيل انشودة العشق وذنوب ترفض التكفير
دخيل اخر ربيع مرني في حضن عشرينك
انا اللي نزلك من برجك العاجي وجاك يسير
يمد لك اليمين ولا درى عن لهفة يمينك
واثرك تشوفني في حلمك اللي في رجا التفسير
على ذاك الحصان الابيض اللي في ميادينك
شعرت بطعم سكينك من اول مابدا التقدير
تمثنيت العروق وقبل اكبر جرح سكينك
لقيتك قبل ما ابحث عنك في الابراج والتبصير
قريتك قبل اموت بلذة قرايه فناجينك
ابي للناس اسولف بك واقول اللي يصير يصير
واحسك سالفه لو سولفوها شوهوا زينك
حشا لو تطري الفرقا مااعدك راعي التقصير
عزاي اني ملكت بوقتها عرش اجمل سنينك
يقولون الزمان اغبر وانا اقول الزمان بخير
ما دام اللي سكن في ناظرك ما طاح من عينك

[الـــصـــعــــب]

لا رحتـي ولا جيتي











ياللي بمرباعي الموعود مهتمه
انتي مطر صيف لا رحتي ولا جيتي
رحلت لا امدح زمان اول اذمه
الا اني اضحك على سابق تناهيتي
يا مقبله ليه خليتيني اليمه
يا حلوها لو بدل ما اقبلتي اقفيتي
ياما تمنيتي العشق يحكي فمه
حتى حكى العشق فوق اللي تمنيتي
عمر نثرتيه رحت انساك والمه
الى تذكرت اذكر عمر تشتيتي
انتي ووقتي وحظي مالكم ذمه
ياما على ونتي غنوا وغنيتي
وااجرحي اللي نفذ صبر وانا اضمه
كيف اتناسى صوابي لو تناسيتي
ما أنتي بذيك اللي الشوق اهدرت دمه
وأنا اللي اظن بين ضلوعها بيتي
يا ليتني قبل اكذب راعي النمه
سويت في طفلنا اللي فيه سويتي
أنا الوفا بين اخوه وبين ابن عمه
وانتي الجفا وين ما رحتي وحليتي
يمكن نخيتي الزمان وشح باللمه
أو شفتي الصدق زودها ومليتي
كذاب لو قلت قلبي راح ما همه
وألفين كذاب لو ما قلت حبيتي
ياللي تركتي الهوى غرقان في دمه
جيتي غريبه ورحتي مثل ما جيتي

[الـــصـــعــــب]

المكان







خذ اللى تطلبه ما دمت اخوى العازم الجزام
لكن اذا شفت دمعي شف لنا شيِِ يسلينا
فتى احلامِِ هنا كان يتغزل في فتاة احلام
حفظها بين حور البحر واغلاها عن المينا
وجاب الها بساط الريح قالت للغلا قدام
ولانحتاج يا مخلوق مخلوقن يوصينا
انا ذاك الفتي الصب وهى اجزل واكرم الاكرام
من اللي مد عمره صدق ف اولنا وتالينا؟
دقيقه من دقايق هالمكان تسوى مية عام
هنا ساعاتنا ما كانت تلحق ثوانينا
هنا ياما تعاهدنا هنا ياما غدينا اخصام
هنا ياما تعاتبنا هنا ياما تراضينا
هنا كنا نصيح وتحتوى صيحاتنا الانسام
لطيفه كنها لامن تجادلنا تهدينا
هنا كان الحمام يطير لكن لاوصلنا حام
يحسب انا من السرب وهو اللى كان ناسينا
هنا طلنا حضن نجد وهواء الطايف وريح الشام
وجوز الهند واعذب دجله وسكر قصب سينا
ما ارقه من مكان الله يوم انّا نجيه هيام
عطاشا جايعين وكان يطعمنا ويسقينا
نجيه بلا هدايا والخفايا حسبة الايتام
وعنود بلا خفايا والهدايا في مخابينا
نحبه كثر ما طشنا وقسمنا فضاه اقسام
ودنيانا شبر في شبر تضحك فى ايادينا
على وضح النقا وضح النقا وضح النقا اللى دام
وكون الكون باللي فيه ما والله يعنينا
توادعنا وودعنا المكان وحارت الاقدام
ولا ملت شفاه افواهنا ترديد اسامينا
ايلين الدمع طاح وطاح معه الشال والبسام
ياليتك تدرى بذيك الدقايق وش حصل فينا
ورى دمعتك سالت وانت اخوى العازم الجزام
انا ما قلت لك دور لنا شيِِ يسلينا؟؟

[الـــصـــعــــب]

يـا قلـب


يا قلب لا تحزن ولو طال ممشاي
خاو الصبر والاّ التعب طبع دربي
وش بك تحسب خطاي يا حادي خطاي ؟
الذنب ذنبك واصبح الكرب كربي
لو عشمك بالمجد واهدى لك الراي
الهاجس اللي مل طرحي وضربي
لا تاخذك ورديّة احلام دنياي
يكفيني اللي لمني وانتثربي
والا سرى ليلك مع راعي الناي
الجرح غطّه كل ما هب غربي
كله عشان اذنٍ شفوقه لشكواي
وعيون حسادٍ تلد النظربي
ادنيت يمي قاصي همه ارضاي
وابعدت عني داني هان قربي
أضمى ولا ارجي حاسدي شربة الماي
لا قرّب الله من يد النذل شربي
حرام اعيش ولو شفع طيب مجناي
ان ما جعلت ادنى العرب يفتخربي
يا قلب توعدني بالامجاد يمناي
ويلوي ذراعي وقتي اللي غدربي
وان راعتك ضلما على سكة مناي
قلت لقدم رجلي بلا قلب سربي

[الـــصـــعــــب]

الغـربـة


يمه الغربه وفرقاك ملتمه
دمعة العين هذي مالها داعي
يا بعد راسي انتي ليه مهتمه
الوجع لي سواة الناي للراعي
آخر اخباري الذمه هي الذمه
والوصايا هذيك تقدّي شراعي
مابه الا السواد يحاود اليمّه
ولابه الا البياض اللي ورى اضلاعي
واشعلٍ ما يفارق حظن امّه
واخضرٍ كل صبح من اول اتباعي
يتعب البرق ما اتعبت النظر يمه
حل مرباعي او ما حل مرباعي
حدّقي بامهات الغيد يا يمه
وانشديهن بعد ما قلّت اطماعي

[الـــصـــعــــب]

الذاهبـة




الله اللي راد والعقده قطعها إللي عقدها
لاعلى الدنياا سلام ولا لباقي العمر زينه
الفضا ماكنها الا خيمةٍ طاحت عمدها
والفرح ماكنه إلا شيخٍ أنقصة يدينه
والعمر قطعة زجاج انكسرة ولاطال امدها
والعرب في العيد بدموع اليتامى مستهينه
والشوارع لفها ثوب الظلام إللي هجدها
والبيووت اطلال من عقب المحبه والسكينه
والشتاء. والليل . والبرد . وسماء يصرخ رعدها
والعيون اللي ورا الشباك مذعووره حزينه
طوّلوا في الكهف الأصحاب وبقة روحي وحدها
كنها في كوكبٍ ثاني خلى من ساكنينه
وينها ليه اتركتني ليه ما جت في وعدها
والقمر لي طل خابرها تجي بيني وبينه
رحت انادي واتلمس في مهب الريح يدها
كني حصان بلا صاحب طوى البيدا حنينه
رحت اصيح الصبح وينه والعرب ما رد احدها
ما سمعت الا صدى صوتي يقول الصبح وينه
كنهم من يوم ذيك الشمس غابت عن بلدها
طلعوني في النفوذ وصكو ابواب المدينه
كنهم من يوم ذيك الذاهبه محدن وجدها
كل رجال من الشرهه قلع في الدرب عينه
اثرها ماتت وماتت كل فرحه في مهدها
والربيع اقفت به الي كانت التاج لجبينه
جاورت عقب الحدايد حفرة مقسى لحدها
حفرة ماني مصدق كيف ضمت ياسمينه
للحزن فيني مثل ما للطهاره في جسدها
ويش اسوي لا فتشت الي لها وسط الخزينه
زخرفت حلم وبنت له مسكن وسمت ولدها
اه لو غرت ولدها في خميلت والدينه
عاهدتني واطفرت يمين اقوى من عهدها
والسبيل لا خير فيه ان كان ما نفذ يمينه
ما تتقى عن رثاها عرق اكتض بشهدها
ولا تبقى خلف قضبان الجفن عذرا سجينه
كيف عند العالم ايام العزى ما احصى عددها
والا لا طالت شهوره والله اعلم كم سنينه
للثرى فيها نبات وللمشيخ افضل نكدها
بس ما فيها طيور ولا البحر يمه سفينه
للقمر هذا مساه وللعصي هذا رغدها
وللزهر هذا شذاه وللذهب هذا رنينه
قالو الشيخ الفلاني مرجع القوم وسندها
قال يبشر بالعوض والعلم جينا ناقلينه
ساقلك بدر البدور الي نشدها من نشدها
جادل هزت عروش خيبت روس ذهينه
قسمها في رسمها في جسمها الا في رشدها
واسمها انجال الغضب قومه على الالسن رطينه
اترك الناي وعطيت شيخينا غن من سعدها
وانبسط ياعم وانسى الي ورا التربه دفينه
قلت ولصدري تناهيت تروع من شهدها
اه ويلاه من يجلب على قلبي ضنينه
خلو اغلى ذاهبه ترعى ربيع الي فقدها
والعطى راعيه محدن صوبها الله لا يهينه
لو ضمنت الجنه تفاحت القلب وشهدها
قلت من بكره عسى مجنونها تاقف سنينه
الله الي راد والعقده قضاها الي عقدها
ولا على الدنيا سلام ولا لباقي العمر زينه